بَفرِد ورد الحلم كله
جُوَّة صدر من البيوت
وارتِّبه
على خصر عَجز رجز وافر
زارع قصيدتي في قلب بحر
غرقان مابين
شَط يأس وشَط خوف
تسحب شعاع الشمس من موجة عاتية
كَسَرها حنين الهدوء
عشان توَّصل لزرعتي نموُّها
بالغذا من قلب ضوء
اللي تعبان من سكة سفر
من غير جذور
عايم على سطح المياة
ورد عاجبه خِفِّته
مالك براح البحر وحده
مع انه مش مالك دَفِّته
حاجب على المظلوم هواه
بيضحك في موته ويبتسم
والحبر اللي نازل على الورق
نازل يعوم
بقلب جامد مش جبان
ما خافش صخر القاع يلومه
ولا حتى نجم بحر سام
مع انه كان خالع هدومه
ولحم رجله فاتح مسام
ما اعرفش ليه واخداه الشجاعة
يمكن عشان
سمكة واحدة واخده بالها
ويمكن عشان
البحر هايج في نن عين الجَبَّارين
لسَّاني واقف على مشط رجلي
والزحمة طاغية على الأنوف
كل الألوف متجمعين
مستنيين
عطر زرعة غرقت قبل ما تكتمل
وقف العمل وطال الانتظار
والجيوب كرهت ايديها
من كتر ما فتحت بيبانها
مش باقي حاجة للبُكا
حتى البطون
اللي كانت بتاكل من السُكات
كلت سُكاتها
واتبقى بس طعم الوجع
طبق مرار والصبر فاسد
ولحم الأمل اللي كان عليه
خطفته حِدَّاية الزمن
المعالق والشوك اتلوثت
وعشٍّش فوق الخبز فطر
اتبقى بس حلم يقظة
بايديه المرفوعة للسما
ولسان يقول قصيدة شعر
على زرعة غرقت في قلب بحر
بعدما اتكتب الحلم كله
على صدر بيت من البيوت
#ابن_السراج
ليست هناك تعليقات:
إرسال تعليق