(بكى وبكاني) ... بقلم الشاعر / حربي علي

زجل

(بكى وبكاني)

قلتله

تلت مرات

هضربك .

ماسمعش الكلام

ولما

ضربتوا

بكي وبكاني

وراح . ينام

ليه

كدا يامحمد

تخلي

بابا يغضب

ويضرب بالحزام؟

مش

تخليك

واد مؤدب

وتشوف لك

مجال وتهرب

م الدمع وم الخصام؟

من :

معاناتي اليومية

مع عيالي

الرأسمال . ليا

حربي علي

شاعرالسويس

(آجي أسلم) ........ بقلم الشاعر المبدع / حربي علي

زجل

(آجي أسلم)

آجي . أسلم تقولي جاي

تبعد . تعلم جروح وناي

ولما أضلم أجريك وراي

عشان بحبك تروح بعيد؟

آآسي بعدك ونار تزيد؟

أنادي ودك ألقاك عنيد

أستنى ردك يغيب نداي؟

آجي . أسلم تقولي جاي

ف الحديت _ أستاذ غرام

ولو ناديت أشوف ضلام

عامل حبيت وتقول سلام

وأما إشتكيت بكيت معاي؟

آجي . أسلم تقولي جاي

تهجر / أهجر عدل وأدب

خيالك ميظهر وإنت السبب

تعشق/ أنور وأجبلك دهب

ولوجيت تقدرأسقيك شاي

آجي . أسلم تقولي جاي

كلمات

حربي علي

شاعرالسويس

(غزة / أريحا).... بقلم الشاعر المبدع / حربي علي

زجل

ماقبل الثورة

(غزة / أريحا)

إتفاقية (غزة/ أريحا)

إتفاقيه (كريهة) الريحة

عرفنا المكتوب فيها

وكان المكتوب دا فضيحة

حكامنا باعوا العرض

وسابوا (الأرض) جريحة

و وسط العالم كله

كانت (القدس) دبيحة

أخذها (القزم) شامير

و رابين إداها (لشيحه)

قسموها زي البطيخة

ولا إدولنا حتى شريحة

والشعب المهضوم حقه

حبسوه في درج (التسريحه)

(قتلوا) صلاح الدين

وهتكوا (عرض) سميحه

قفلوا باب (جهادنا)

وقالوا القعدة مريحة

ضحكوا على عقول شبابنا

وقالوا الموضة ف تسريحة

زجل

سياسي نقدي

ل حربي علي

شاعرالسويس

(أكل العيش) ........... بقلم الشاعر المبدع / حربي علي

زجل

ماقبل الثورة

(أكل العيش)

أكل ( العيش ) خلانا (بهايم)

و(الجوع) خلاهم بني آدمين

( إتسعرنا ) ومن كتر العزايم

خايفين ناكلك يا (فلسطين)

إشتغلنا ( كتير ) إشترينا إيه؟

إشترينا ( ذل ) وبعنا كرامة

خلفنا ( ولد ) زرعنا فيه :

حب ( البطن ) وكره (شهامة)

قاعدين

(لمة) حوالين الطبلية

بنشوف

ف التليفزيون سهرة بالليل

بنمصمص

فى (عضم) فلسطينية

( إغتصبها )

عساكرك ياإسرائيل

ونقوم

م السهرة مش عارفين

(القدس)

حياتنا ولا النيل؟

ونام

وكأني ( خلاص ) بنموت

ونشوف

ف (الموت) راحة من الهم

لا

( ضمير ) سامعين له صوت

ولا

أكلة ( ملطخة ) بالدم

حربي علي

شاعرالسويس

زجل (آه م الحريم) ......... زجل ساخر ... بقلم الشاعر / حربي علي شاعرالسويس

زجل

(آه م الحريم)

آه م الحريم يهدوا جبل

يحبوا لئيم ويموتوا غزل

آه م الحريم تخرب بيتك

وحب قديم يشل وريدك

والله العظيم . أنا حبيتك

بس الكريم شباكه قفل

أه م الحريم يهدوا جبل

جت سودة من ساحل العاج

خلاها بيضة كترالمكياج

بتنورضلمة وتقولي سوفاج

ووسط الزحمة أمر/ عسل

آه م الحريم يهدوا جبل

تيجي يمين تلقاها شمال

ترش حنين تملاك عيال

تذل سنين / تقلب لك حال

نكون نايمين؟ وتركب عجل

أه م الحريم يهدوا جبل

ح صاحب راجل مالح/عادم

أحسن من ستين مش فاهم

ولاواحدة تنشف مخ العالم

وتيجى تألف / شعر وزجل

أه م الحريم يهدوا جبل

يحبوا لئيم ويموتوا غزل

زجل

ساخر

حربي علي

شاعرالسويس

(حبيت من الفيس) ... بقلم الشاعر / حربي علي

زجل

(حبيت من الفيس)

قالي حبيت من الفيس

بنت حلوة ___ إيزيس؟

قلتله ياراجل إعقل

يا أبوالعيال __ إتنيل

معاك حسن _ بيرضع

وحسين تلقاه بيسمع

ياخي إنت __ مابتشبع

ولابتنسي يوم خميس؟

قالي حبيت من الفيس

كلها صور _ أجانب

حيات من العقارب

لغه بتنسي __ الحروف

ف العيب تعالي _ شوف

لسه برضك ___ خروف

بتحب_ تموت _ فطيس؟

قالي حبيت من الفيس

عيب __ إرجع لأهلك

أم عيالك دي _ شكلك

مخدناش ع الكلام دا

دا إحنا كروت معايدة

رجاله وصعايده

مش عروسة وعريس

قالي حبيت من الفيس

بنت حلوة __ إيزيس؟

زجل

حربي علي

شاعرالسويس

(المشكلة) ... بقلم الشاعر / حربي علي

زجل

(المشكلة)

المشكلة

مش في العيال

ولا كانت ف المرا

المشكلة

في أشباه رجال

دماغها مجنزرة

كل

مايحلولها طوق

تفتح ع المسخرة

ويوم

ماجات تسوق

شفناها تجيب ورا

وعجبي

حربي علي

شاعرالسويس

(منتخب صلاح) .... بقلم الشاعر / حربي علي

زجل

(منتخب صلاح)

فعلا

دا منتخب محمد صلاح

لا تقولي

بقى :

منتخب شنكح

ولابنكح ولا البت صباح

ياراجل؟

دا إنت تسأل عليه

( يقولولك ف الجامع )

وهوه

دا بقى

اللي بيصلي

وبيلعب

كورة . بضمير مرتاح

حربي علي

شاعرالسويس

(تعليم علماني) .... بقلم الشاعر / حربي علي

زجلية

(تعليم علماني)

العلم

اللي مش

(مبني)

علي الدين

يطلعك

(السما)

ف التعليم

لكن :

على

(الأرض)

يا مسكين

إنت

أكتر

واحد

(جاهل)

والله العظيم

وعجبي

حربي علي

شاعرالسويس

(عن شرط) .... بقلم الشاعر / حربي علي

زجل

(عن شرط)

الثقافة

بقت. أغاني

والتعليم

بقى. علماني

والوطن

بقى مش ليك

ولا ليا

ولا لحد تاني

وبإيدك

تغير . البلد

بس

عن شرط.

تضيع زمانك

وفوق زمانك

زمن تاني

فوق . زماني

وعجبي

حربي علي

شاعرالسويس

(ديما تكدب) ... بقلم الشاعر / حربي علي

زجل

(ديما تكدب)

حلفت كتير وديما تكدب

خلتني آسير وكمان بتعذب

إكمني عشقت تكدب/تحلف

أرد. رجعت تيجي تسقف

ترقص سبت وأياام تخلف

المر. شربت ولساك تعجب؟

حلفت كتير وديما تكدب

إتعودت عليك وقلبي مصدق

علشان عنيك دمع / أسترزق

كدب / يخليك مارد. تعشق

تنوم مماليك . من المغرب؟

حلفت كتير وديما تكدب

إحساس العاشق ليه. يتغير؟

يعيش مفارق عمر. قصير

خليك صادق عصفور وصغير

لتبقى سوابق. وتكبر/ تقلب

حلفت كتير وديما تكدب

خلتني آسير وكمان بتعذب

زجل

حربي علي

شاعرالسويس

(كتاب شياطين) .... بقلم الشاعر / حربي علي

زجل

(كتاب شياطين)

شعراء/كتاب/شياطين

باعوا التقاليدوالدين

واحد كاتب (أعبدك)

حمار ولافاهم حاجة

أشرك بالله في منت

عشان تصويره السادة

عايش قصة تيتانك

مهو أستاذوا خواجة

وزميل اللورد كوهين

شعراء/كتاب/ شياطين

باعوا التقاليد والدين

وواحدة غبية (شعر)

بتقول: أحب المخمور

أسلوبها تحت الصفر

عاوزه الكل يزور

باعت الجسم بعذر

أقبح من أي فجور

خلعت وقار السمر

ولبست خيال مدلين

شعراء/كتاب/ شياطين

باعوا التقاليد والدين

نقد

ساخر

لحربي علي

شاعرالسويس

(أرفض التوقيع) ... بقلم الشاعر / حربي علي

من

قمة الظلم

ف العمل

كتبت :

(أرفض التوقيع)

أقسم

بالله العظيم

أنا لم :

(أعوج) بخط السير

وشارفت على الخمسين

فرجاءا . التقدير

فأنا

مازلت أحترم التعليمات

وأشتغل . بضمير

خدمت

الشركة (15 سنة)

واسألوا

عني . كثير

فأنا

بلا فخر

أعطيت . (جل) خبرتي

لكل . صغير

ولكن

ليس :

من العدل أن (أصغر) أنا

وكلا

من حولي . كبير

كلمات

حربي علي الصغير

(خليكي كدا) ... بقلم الشاعر / حربي علي

زجل

(خليكي كدا)

خليكي

كدا ملاك

في زمن الشياطين

جاهلة

بالعدى

ولو كانوا كافرين

لا ليكي

في السياسة

ولا عارفه الخلاصة

إن مش كل

الناس الرخيصة

بني آدمين

حربي علي

شاعرالسويس

(أه م المشاكل) ... بقلم الشاعر / حربي علي

زجل

(أه م المشاكل)

أه يانا م المشاكل

حبل مفتول وقافل

والدنيا هوجه لكن؟

الحبل يحله عاقل

بيت وأستاذ دروس

دنياا وتعوز فلوس

والجيب عاملى عازل

فلوس ويا التيوس

بس متعملش راجل

أه يانا م المشاكل

وقانون رجل أعمال

بزنس ألماظ ومال

راس مالية منازل

تقعد ماسكه الحبال

حتى الحبال بتاكل

أه يانا م المشاكل

ومشيت وحدى أفكر

لونى أبيض ولاأسمر؟

الشعر شاب ف عامل

وضغط عيال وسكر

جانى مرسوم وعاجل

أه يانا م المشاكل

حبل مفتول وقافل

زجل

حربي علي

شاعرالسويس

(ثقافة غربي) ... للشاعر المبدع / حربي علي

زجل

(ثقافة غربي)

بيحب مصر بثقافة غربي

شباب وكسر عامل أوروبي

أديله صفر بس الل يعبي

واقف يعارض بصورة جيفارا

باليد عاضض علبة سيجارة

يشرب / يعفر شارع وحارة

وإن جه يفكر / يقفل إشارة

ومصرتصغرفي عيون حبايبي

بيحب مصر بثقافه غربي

عاوز يكون زي كاسترو

أو لينين دا الل فاكروا

فيلسوف غبي يشد آزره

يبيع / يشتري ويضل فكرو

وعنده النبي ساكن في جمبي

بيحب مصر بثقافه غربي

فاكر بلدنا بنظامه تمشي

وتاريخ جدودنا مايفطر يعشي

عايزله قدوة كافره تحشي

أفكارها مرة تلخبط لي وشي

فاكرها حلوة تقولوا جبي

بيحب مصر بثقافة غربي

شباب وكسر عامل أوروبي

أديله صفر بس الل يعبي

(نقد ذاتي)

لحربي علي

شاعرالسويس

(الدخان) .... بقلم / لحربي علي

زجل

(الدخان)

غزال وشرب الدخان

مش خايف م السرطان

صدره ياناس مليان

نيكوتين ويا القطران

قلت له بلاها سجاير

راحت أحلى ضفاير

خسيت ياحلو كتير

م الكحه وم التشخير

تقع من (أوطى) سرير

وماتجريش ربع الفدان

غزال وشرب الدخان

قالي عاوزنى (أبطل)

تعالى وديني المعمل

(أحلل) ضغط وسكر

سندني يمكن أقدر

وإديني البوسة وكتر

وهات لي من الرمان

غزال وشرب الدخان

قلت له أبدا ماأبوسك

و(بقك) عيان بفلوسك

خايف عليك ياحبيبي

(أعالجك) وإنت طبيبي

أصرف عليك من جيبي

وأبيع حتى (الدكان)

غزال وشرب الدخان

جات (التحاليل) سلبية

وخايف المرة الجايه

الحلو أبوخد وشامة

مايسمع حتى (ملامة)

يهجرني بألف سلامة

ويشرب (شيشة) كمان

غزال وشرب الدخان

مش خايف م السرطان

هههههههه

زجل

ونقد ساخر

لحربي علي

شاعرالسويس

زجل بعنوان (كدا برضه) ... للشاعر / حربي علي

زجل

(كدا برضه)

كدا

برضه ياأوروبا

أمشي

معاكي أيام صعبة

تمشي

إنت على (الدين)

وأرجع أنا والفوضى؟

مش

كنا متعاهدين

ع (النجاسة)

إحنا الإتنين

وبقيت أنا علماني

وآهي كانت تتقضى؟

كان

حالنا حلووماشي

وفصلت

اللي :

بيقولوا عليه فاشي

(صليت زي ماصليتي)

من غير حتى م توضى؟

زرعتي .

(الفوضى الخلاقة)

جننتي .

أعضائي المشتاقة

وأول ماجيت أحضن .

خضتيني أكبر خضة .

وصحيت .

على الدين بالإسم

وطلعتي .

إنت من (كل الجسم)

لااا

فوقت من الغربة

ولااا

عالجوني مع المرضى .

كدا

برضه ياأوروبا؟؟؟

حربي علي

شاعرالسويس