(إلي من أعشق)
هي قعده وسط زيطه
هي توهه في بحور غويطه
هي ايوه هي هي
هي ملت الكون عليا
هي أمي هي بنتي
هي اخويا هي اختي
هي تبقي يا ناس حبيبتي
يا نور ساطع ونور المكان بيكي
أنا جيتلك وعن حياتي أنا حكيتلك
عن نقص وعن حرمان
عن توهان في كل مكان
يجوز النقص ده اتملي
لما عنيا جات في عنيكي
لكن حرماني ذاده الشوق
كإني طير وطاير فوق
أو سكران مش قادر أفوق
و مستني تهزيني تضميني
وساعه اللقا تهديني
حنين غايب بقاله فتره
واندفنت معاه ذكره
وعايش نفسي أشوف بكره
واهو دلوقتي جه بكره
أخيرا شوفت أنا ملاكي
أيوه يا ستي بهواكي
بقالي سنين عايش اللحظه مستني
واصبر نفسي بالتفكير
وأقول لسه صغير سني
وأقول أيوه هيجي اليوم
وتتشال من عليا هموم
واصحي فيه وأقوم من النوم
رغم إني مطفي النور
لكن الاوضه بتنور
فيها حاجه متغير
وابص علي مكان النور
الاقي قمره من بدري
سانده الخد علي صدري
بتحكيلي
إني فارس أحلامها
وقبل الوقت ده بشهرين
كنت بزورها في منامها
وكان اسمي لوحدة بس
مترصص في كلامها
وشاغل كل تفكيرها
وكانت لما تزعل
تكبت جواها النوح
مش أي حد في الزمن ده
ليه بجرحك تبوح
فتجري بسرعة علي صورتي
وتحضنها بقي في حضنها
وتحكيلي عن أخواتها
وعن مامتها وعن زنها
ومين اللي شغل قلبها
ومين اللي سرق حبها
وفجاه تنام علي صدري
وتنزل من عيونها دموع
صحيح الحب ده اعمي
وطريقه ملهش رجوع
وصعب انك تحب إنسان
وصوتك ليه مهوش مسموع
وصعب انك تنام مقهور
وقلبك يبات موجوع
نامي يا عمري بقي وانسي
وارمي حمولك علي حملي
أنا انسك وانتي انسي
بحوري عايمه بالأشواق عبي منها بقي وأملي
خلاص أنا ضهرك أنا سندك
أنا عزوتك انا مالك
أنا عايش عشانك بس
ومين بيكي يا قمره يحس
غير عاشق لدلالك
م/محمد عيد
ليست هناك تعليقات:
إرسال تعليق