الدنيا وما فيها ..... بقلم الشاعر / على حزين

الدنيا وما فيها

قاعد ورافع وِشَّك للسماء , بتفكر في إيه يا عم

إمبارح راح وعدى خلاص , إنساه ولا بيه تهتم

وبكره لساه غيب انساه , ولا تستناه ولا تعول له هم

ولا تخليه علي البال ولا تقول بكره هعمل ايه يا عم

والنهارده زي الفل أشطه يا عم وعال العال

مالك شايل الهم , والحزن جواك هم ما يتلم

وشايفها أضيق من َّثم , وبكره بيه مهتم

شايل الدنيا فوق راسك , وبالآخرة متحزم

زرعتها بطيخ طلعت خيار إياك

ولا الشيطان بيطبل لك وانت متحزم

أولادك دول حلوين وربنا من العين يحميهم

فارس راح المدرسة وخديجة قمرين

ويحيي ربنا يشفيه والسيد أديك مستنيه

وأمهم أصيله وبنت حلال تستاهل تقلها مال

زينه وحلوه وعال العال وعقلها يوزن جبال

أميره وبنت الأمره طيبة وطاهرة وعلى الفطرة

ساترة مكانك ومريحاك وعايشه معاك علي قد الحال

وعلي الحلوة والمرة ما اشتكت في يوم حال

إن كلت ملح اه , وان كلت فراخ تفضل مستنياك

لا تحط الزاد ولا تدوقه إلا لما تيجي اتعشيهم

وتلمهم حواليك وتلعبهم وتضحكهم وتراضيهم

صوامة وقوامة وحافظه لكتاب الله

وصايناك في مالك وعيالك وفى حضورك وغيابك

وعايشه معك على هواك

لعمرها جات في يوم وقالت لك هات هات

زي النسوان اللي تربي الهتهات

ولا اشتكت منك , ولا بكت ولا حكت لأمها

ولا حد من الجيران , ودايماً طالبة رضاك

وشايفاك سيد الرجال وانت شايفها غزال

يبقى بقى مالك قاعد ليه مخنوق قرفان

طهقان , متضايق , زهقان , زعلان

إيدك على خدك ودايماً سرحان

شايل هموم الدنيا فوق راسك

مالك إيه إللى جرالك , أبوس راسك ,

أوعي تقولي الفلوس , ملعون أبو الفلوس

بتروح وتيجي , بالك , عامله زى الدبان الأزرق

لا بتتلم , ولا بتيجي , ولا بتحط إلا على الرمم ,

واللي مش نضيف , واللي مش تمام ,

وأنت نضيف بره وجوه , وزي الفل كمان وعال العال

لعمرك وسخت إيديك , ولا دخلت لجيبك لقمه حرام

ولا بتحب تئذي غيرك , وبتحب الخير لكل الناس

عشان كده ربنا مبارك لك في صحتك وعافيتك

وحيلك وعيالك ومراتك كمان ,

الكنز اللي أنت مش عارف قيمته

يبقى بقى بوس أيديك وش وضهر

واحمد ربنا عشان يزيدك , ويديك كمان وكمان

ويا ما عطا لك كتير نِعَم من غير حد ولا عد

أولها الإيمان وأخرها القناعة

يبقى بقى قاعد ليه زعلان ,

مهموم مضايق سرحان , وشايل الدنيا فوق راسك

أوعاك تقولي الدنيا أوعاك

إياك أسمعك تجيب لي سيرتها إياك ,

دي خسيسة وواطية وفانية ولا تساوي جناح بعوضة

ولا تساوي فردة جزمه قديمة

جيفة ومعفنة ورمَّه وقذرة

وببجري عليها الكلاب السعرانة

ترضى تكون زيهم سعران

إن رضيت أنت , أنا والله ما أرضهالك

يبقى بقى مالك , قوم فذ على حيلك

وشوف اللي ورآك دا عيالك مستنينك

تقعد معاهم وتحكي لهم حواديت

وتديلهم جرعة حنان , وتلاعبهم زي زمان

وفرفش بقى وسيبك من التوهة والسرحان

واضحك اضحك وفكّك بقى وفضك

وسيبك من التوهة والسرحان

" شعر / على حزين "