***** عم سعيد *****
ف اوضه مترين ف تلاته
وعيشة بسيطة معتادة
سريره أصله ... كان دكه
لاقاه على جنب ف السكه
ودولابه كراتين ... مرصوصه
وستارته مربوطه على بوصه
ولمبة جاز لكن فاضيه
عايزه الجاز .....
بس الحاله مش راضيه
وحله وطبقين وكوبايه
وسكينه تلمه وكنكايه
ومعلقه صفرا وفلايه
وقعر الحله له مرايه
وبابور بشريطه محروقه
وعيشه ف حاره مزنوقه
ودورة ميه ..... مشتركه
وطول الوقت .. مخترقه
عيشه ف جنب ع الهامش
تشوفه تقول مش عايش
هيكل وملبسينه هدوم
وم النجمه لابد يقوم
لجل مايسعى ع اللقمه
ونص غموسه م الصدقه
وأيام بتمر مش فارقه
إسمه بينادوله ... سعيد
وعمره ماكان ف حياته عيد
ولافرح خبط على بابه
ولاسعد كان من أصحابه
أو ضحكه خطرت على باله
كل حياته ... شقى وتعتير
من صغره وهو عجوز وكبير
قابلته مره ف الحاره
وكأنه صادنى بصناره
لاقتنى رايح نواحيه
وبإيدى .. سلمت عليه
وقلت له
ياوالدى ... عامل إيه
قالى عايش زى خلق الله
حامده وشاكره ومنايا رضاه
مش عايز حاجه ... ياعم الحاج
قالى نفسى أزور .. ومنايا أحج
طب والعيشه ... وأكل العيش
وعيشة الضنك ولبس الخيش
قال دى بسيطه .. ماتلزمنيش
طول مافيا لسان بيقول
ذكر الله معايا على طول
ذكر الله ... معايا على طول
أحمد أبو عاصم
ليست هناك تعليقات:
إرسال تعليق